Gwelwyd tystiolaeth o welliant yng ngwasanaeth mamolaeth Ysbyty'r Tywysog Siarl

Cwblhaodd AGIC arolygiad dirybudd ar y safle o'r uned mamolaeth ar dri diwrnod olynol ym mis Medi 2022. Canfu'r arolygwyr fod y gofal mamolaeth a ddarparwyd wedi gwella ers ymweliad blaenorol AGIC yn 2019, ond bod rhai meysydd yr oedd angen rhoi sylw iddynt o hyd.

Gwelsom fod y staff yn ymrwymedig i ddarparu gofal o safon uchel i'r cleifion. Nododd y tîm arolygu nifer o enghreifftiau lle roedd y staff yn trin y cleifion a'u hanwyliaid mewn modd tosturiol, caredig a chyfeillgar. Dywedodd y rhan fwyaf o'r cleifion y gwnaethom siarad â nhw wrthym eu bod yn hapus ac yn cael gofal da yn yr ysbyty.

Argymhellodd yr arolygwyr y dylid gwneud gwelliannau i gofnodion y cleifion er mwyn sicrhau eu bod yn gynhwysfawr ac yn cydymffurfio â chanllawiau cenedlaethol, oherwydd gall dogfennaeth wael arwain at lefelau cynyddol o risg. Mynegwyd pryderon hefyd ynghylch y lefelau staffio yn yr ardal brysbennu a oedd, ar y cyd â'r cynllun, yn ei gwneud hi'n anodd sicrhau nad oedd y cleifion yn cael eu gadael heb eu goruchwylio.

Gwelsom welliant yn ansawdd y rheolaeth a'r arweinyddiaeth ers yr arolygiad diwethaf. Fodd bynnag, tynnodd y staff sylw yn eu hadborth at bryderon ynghylch diwylliant y staff, a chafwyd nifer o sylwadau negyddol yn yr arolwg staff. Mae pwysau'r ymatebion negyddol yn yr arolwg yn pwysleisio'r angen am ymdrech a chamau gweithredu parhaus gan y tîm arwain i wella diwylliant a morâl yn y gwasanaeth, fel y gellir cynnal y gwelliannau a wnaed hyd yma, ac adeiladu arnynt.

Mae'r bwrdd iechyd wedi llunio cynllun sy'n cynnwys cyfres gynhwysfawr o gamau gweithredu i gefnogi gwelliannau pellach.

Dywedodd Prif Weithredwr AGIC, Alun Jones:

Roedd yn galonogol gweld tystiolaeth bod y bwrdd iechyd wedi dechrau rhoi systemau a phrosesau ar waith i fynd i'r afael â'r meysydd i'w gwella a nodwyd yn ein harolygiad blaenorol. Roedd systemau a phrosesau penodol iawn ar waith i sicrhau bod yr ysbyty yn canolbwyntio ar wella ei wasanaethau'n barhaus.

Fodd bynnag, mae'r adborth a gafwyd gan y staff yn dangos bod angen i Fwrdd Iechyd Prifysgol Cwm Taf Morgannwg wneud mwy i geisio ymgysylltu â'r staff er mwyn mynd i'r afael â'u pryderon a gwella diwylliant y gwasanaeth.

Rhaid mynd i'r afael â'r pryderon a nodwyd er mwyn sicrhau bod ansawdd y gofal a ddarperir yn parhau i wella. Byddwn yn parhau i ymgysylltu â'r gwasanaeth er mwyn sicrhau y gwneir cynnydd yn erbyn ein canfyddiadau.

Arolygiad o Ysbyty: Gwasanaethau Mamolaeth – Ysbyty'r Tywysog Siarl, Merthyr Tudful

Adroddiad Cryno ar yr Arolygiad – Gwasanaethau Mamolaeth, Ysbyty'r Tywysog Siarl, Merthyr Tudful