Mae'r gofal brys yn Ysbyty Athrofaol Cymru yng Nghaerdydd yn gwella
Mae Arolygiaeth Gofal Iechyd Cymru (AGIC) wedi cyhoeddi adroddiad (6 Mehefin 2024) yn nodi gwelliannau yn y gofal a roddir yn yr Adran Achosion Brys yn Ysbyty Athrofaol Cymru, a gaiff ei redeg gan Fwrdd Iechyd Prifysgol Caerdydd a'r Fro.
Roedd yn gadarnhaol gweld bod llawer o welliannau wedi cael eu gwneud ers ein harolygiad blaenorol ym mis Mehefin 2022, a nodwyd sawl maes o arfer da. Fodd bynnag, roedd rhai meysydd yr oedd angen rhoi sylw iddynt a'u gwella o hyd.
Cwblhaodd arolygwyr yr arolygiad dirybudd o Adran Achosion Brys, Uned Penderfyniadau Clinigol ac Adran Achosion Brys Pediatrig yr ysbyty ar dri diwrnod dilynol ym mis Mawrth 2024.
Pan wnaethant gyrraedd, roedd yr adran yn y categori uchaf o ran lefel rhybudd oherwydd y galw a oedd arni. Roedd yr ystafell aros yn llawn, ac roedd ambiwlansys yn aros y tu allan. Er bod yr adran yn eithriadol o brysur, nid oedd ymdeimlad o gynnwrf yn yr uned. Roedd y staff a'r rheolwyr yn ymwybodol o'r sefyllfa, ac roedd camau priodol wedi'u cymryd mewn ymateb i'r lefel rhybudd. Clywodd ein harolygwyr am fentrau parhaus i ddatblygu a gwella'r gwasanaeth i gleifion, gan gynnwys gwasanaeth y Parth Asesu a Thrin Cyflym (RATz), a oedd wedi bod yn helpu i leihau'r amseroedd aros. Yn ôl pob golwg, roedd gan yr adran gydberthnasau gwaith da â rhanddeiliaid fel y gwasanaeth ambiwlans er mwyn lleihau amseroedd aros.
Gwelsom fod y staff yn ymrwymedig i ddarparu gofal o safon uchel i'r cleifion. Gwelodd y tîm arolygu sawl enghraifft o'r staff yn ymddwyn mewn ffordd barchus a chyfeillgar tuag at y cleifion. Pan ofynnwyd iddynt, dywedodd y cleifion wrth ein harolygwyr eu bod yn hapus â'r gofal a oedd yn cael ei ddarparu, a bod eu preifatrwydd a'u hurddas yn cael eu diogelu. Gwnaethant hefyd ddweud wrthym eu bod wedi cael digon o wybodaeth i'w helpu i ddeall eu gofal a'u cyflyrau meddygol. Roedd y Gymraeg yn cael ei hyrwyddo'n dda yn yr adran a gwelodd yr arolygwyr fod amrywiaeth o daflenni ar gael i roi cyngor i'r cleifion ar ôl iddynt gael eu rhyddhau. Fodd bynnag, nid oedd proses cwynion a phryderon GIG Cymru ‘Gweithio i Wella’ yn cael ei harddangos yn amlwg ym mhob rhan o'r uned.
Tynnodd ein harolygiad blaenorol sylw at yr angen i wella trefniadau atal a rheoli heintiau. Aethpwyd i'r afael â hyn pan adnewyddwyd yr uned yn ddiweddar, a thrwy adleoli'r ardaloedd clinigol. Ar y cyfan, roedd yr amgylchedd ffisegol wedi'i gynllunio ac yn cael ei gynnal a'i gadw'n dda, er nad oedd arwyddion cyfeirio digonol yn yr adran.
Roedd proses ddigidol ar waith i sicrhau bod y cyfarpar brys yn cael ei wirio'n rheolaidd. Fodd bynnag, gwnaethom gyhoeddi hysbysiad sicrwydd ar unwaith am nad oedd tymheredd meddyginiaethau a'u dyddiadau dirwyn i ben yn cael eu gwirio'n gyson. Ni chafodd yr arolygwyr sicrwydd bod cyfarpar meddygol yn cael ei wasanaethu a'i raddnodi'n briodol i sicrhau diogelwch y cleifion. Roedd yn destun pryder nad oedd y staff o'r farn bod y cyfarpar roedd ei angen arnynt ar gael yn hawdd iddynt, fel thermomedrau a pheiriannau cofnodi arwyddion hanfodol i fywyd. Rhaid i'r bwrdd iechyd sicrhau yr ymdrinnir â hyn er mwyn osgoi risgiau i ddiogelwch y cleifion.
Ar y cyfan, roedd y cofnodion cleifion a welsom yn dangos bod staff nyrsio wedi asesu'r cleifion i weld a oedd risg y byddent yn datblygu cyflyrau meddygol pellach. Fodd bynnag, wrth edrych ar y cofnodion cleifion, gwelsom fod nodiadau yn anhrefnus ac yn anodd eu dilyn. Yn ogystal, gwelsom yn aml nad oedd y staff meddygol yn llofnodi cofnodion. Rhoddodd uwch-aelodau o'r staff enghreifftiau o archwiliadau a gynhelir yn yr Adran Achosion Brys. Roedd y rhain yn ystyried meysydd sy'n berthnasol i'r ddwy uned, fel adborth gan gleifion a staff, yr amgylchedd a chyfleusterau, cwblhau dogfennau asesu risg i gleifion ac atal a rheoli heintiau. Fodd bynnag, gwelwyd nad oedd canlyniadau'r gweithgarwch archwilio yn cael eu harddangos.
Roedd strwythur rheoli addas ar waith a disgrifiodd uwch-aelodau o'r staff linellau adrodd clir, gydag arweinyddiaeth weladwy a chefnogol. Gwelsom dystiolaeth o fentrau newydd i wella lefelau cadw staff, gan gynnwys llwybr sefydlu i aelodau newydd o staff. Roedd hyn yn cynnwys cysgodi staff profiadol, cwblhau cymwyseddau a hyfforddiant dros gyfnod o ddeuddeg mis. Roedd hefyd yn gadarnhaol gweld bod aelodau newydd o staff wedi cael eu recriwtio i rolau hanfodol ers ein harolygiad blaenorol. Gwelsom fod cyfraddau cydymffurfio ar gyfer hyfforddiant gorfodol yn briodol ar y cyfan. Fodd bynnag, gwelwyd cyfraddau isel o ran cwblhau hyfforddiant diogelwch tân, cynnal bywyd sylfaenol a chynnal bywyd brys pediatrig.
Dywedodd Prif Weithredwr Arolygiaeth Gofal Iechyd Cymru, Alun Jones:
‘Mae pwysau cynyddol ar wasanaethau'r GIG ac mae Ysbyty Athrofaol Cymru, fel pob ysbyty, yn parhau i wynebu heriau eithriadol oherwydd galw cynyddol. Roedd yn galonogol gweld tystiolaeth bod y bwrdd iechyd wedi dechrau rhoi systemau a phrosesau ar waith i fynd i'r afael â'r meysydd i'w gwella a nodwyd yn ystod ein harolygiad blaenorol ym mis Mehefin 2022. Mae rhai pryderon y mae angen mynd i'r afael â nhw o hyd er mwyn sicrhau bod ansawdd y gofal a ddarperir yn parhau i wella. Byddwn yn parhau i ymgysylltu â'r bwrdd iechyd er mwyn sicrhau y gwneir cynnydd amserol yn erbyn ein canfyddiadau.’