Mae adroddiad AGIC yn nodi ‘risgiau i gleifion’ a ‘phryderon sylweddol’ yn Adran Achosion Brys Ysbyty Glan Clwyd yn y Rhyl

Nododd arolygiad AGIC nad oedd gan Fwrdd Iechyd Prifysgol Betsi Cadwaladr drefniadau digonol ar waith yn yr adran i gefnogi darpariaeth gofal iechyd diogel.

Cwblhaodd AGIC arolygiad dirybudd o'r adran achosion brys am dri diwrnod yn olynol ym mis Mai eleni. Cynhaliwyd yr arolygiad hwn i fynd ar drywydd y pryderon sylweddol a nodwyd gan AGIC yn ystod gwiriad ansawdd blaenorol a gynhaliwyd ym mis Mawrth 2022.

Daeth ein harolygwyr i’r casgliad bod diffyg gwelliant i safon dderbyniol mewn perthynas â’r pryderon a nodwyd ym mis Mawrth 2022. O ganlyniad, dynododd AGIC yr adran achosion brys yn Ysbyty Glan Clwyd yn Wasanaeth sydd Angen ei Wella’n Sylweddol ar 9 Mai 2022. At hynny, nododd arolygiad mis Mai sawl maes ychwanegol o bryder sy’n ymwneud â diogelwch cleifion.

Amlygodd yr archwiliad ar y safle ym mis Mai fod yr adran achosion brys yn profi cyfnod o alw di-ildio ar ei gwasanaethau. Nododd AGIC fod y staff mewn amgylchedd dan bwysau mawr, gan weithio y tu hwnt i'r disgwyl mewn amodau heriol. Fodd bynnag, canfu AGIC nad oedd y bwrdd iechyd yn cydymffurfio'n llwyr â nifer o'r Safonau Iechyd a Gofal, a phwysleisiodd feysydd o bryder sylweddol a allai gyflwyno risg uniongyrchol i ddiogelwch cleifion.

Roedd y pryderon hyn yn ymwneud ag effeithiolrwydd trefniadau ar gyfer asesu, monitro, arsylwi ac uwchgyfeirio cleifion sâl neu gleifion sy'n gwaethygu. Nododd AGIC hefyd fod ansawdd y ddogfennaeth nyrsio yn llawer is na'r safon ofynnol a chanfuwyd tystiolaeth o reolaeth wael o risgiau iechyd a diogelwch, megis trefniadau dod i mewn a gadael yr ardal bediatrig nad oeddent yn ddiogel. Roedd gweithdrefnau atal a rheoli heintiau hefyd yn annigonol.

O ganlyniad, ni chafodd AGIC ei sicrhau bod y prosesau a systemau ar waith yn ddigonol i sicrhau bod y cleifion yn derbyn yn gyson safon dderbyniol o ofal amserol, diogel ac effeithiol.

Canfu AGIC nad oedd ansawdd y rheolaeth a’r arweinyddiaeth wedi’i ffocysu’n ddigonol nac yn ddigon cadarn, ac roedd yn bryderus i ganfod nad oedd y trefniadau ar gyfer goruchwylio wedi galluogi’r bwrdd iechyd i sylwi ar y materion a nodwyd gan AGIC yn ystod yr arolygiad.

Amlygodd AGIC feysydd lle'r oedd angen gweithredu ar unwaith er mwyn cadw’r cleifion yn ddiogel. Mae AGIC wedi annog y bwrdd iechyd i ystyried holl ganfyddiadau'r adolygiad hwn yn ofalus a chymryd camau i leihau'r posibilrwydd o niwed sylweddol i’r cleifion ac i ymgorffori pob gwelliant mewn ymarfer.

Mae'r dynodiad Gwasanaeth sydd Angen ei Wella’n Sylweddol sy’n berthnasol i’r adran achosion brys ar hyn o bryd yn ein galluogi i gynllunio a chyflawni gweithgareddau angenrheidiol yn y dyfodol i gael sicrwydd ynghylch ansawdd a diogelwch gofal yn y gwasanaeth hwnnw.

Dywedodd Prif Weithredwr AGIC, Alun Jones:

Mae’r canfyddiadau yn yr adroddiad hwn yn peri pryder mawr, ac rydym wedi annog y bwrdd iechyd i gymryd camau ar unwaith i amddiffyn y cleifion rhag y risgiau a nodwyd. Mae'r dynodiad wedi'i bennu i gryfhau a chyflymu'r mesurau a gymerwyd i ysgogi gwelliannau amserol o fewn y gwasanaeth. Byddwn yn gweithio gyda'r bwrdd iechyd i sicrhau bod gwelliannau cadarn yn cael eu gwneud mewn modd amserol, a byddwn yn ystyried amseriad unrhyw weithgarwch dilynol, y bydd angen tystiolaeth ohono.