Uwchgynhadledd Gofal Iechyd

Mae cyfarfodydd Uwchgynhadledd Gofal Iechyd yn cael eu cynnal ddwywaith y flwyddyn er mwyn rhoi cyfle i gyrff gwella, rheoleiddio, arolygu ac archwilio drafod â'i gilydd.

Maent yn darparu fforwm rhyngweithiol ar gyfer rhannu gwybodaeth am ansawdd a diogelwch gwasanaethau gofal iechyd a ddarperir gan GIG Cymru.

Dyma'r canlyniadau a ragwelir: 

  • Cydberthnasau gwaith agosach a rhannu gwybodaeth rhwng y sefydliadau sy'n cymryd rhan
  • Mae rhaglenni gwaith y sefydliadau sy'n cymryd rhan yn cael eu llywio gan y wybodaeth a rennir ac yn adlewyrchu dull ar y cyd o fynd i'r afael â meysydd sy'n peri pryder a/neu feysydd sydd angen eu datblygu 
  • Cytunir ar bryderon risg uchel ar y cyd a'u rhannu ym mhob cyfarfod Uwchgynhadledd. Efallai y caiff y canlyniad ei ddefnyddio i lunio adborth i Gyfarwyddwr Cyffredinol y Gwasanaethau Cymdeithasol ac Iechyd, a Phrif Weithredwr GIG Cymru, a'r Prif Weithredwr priodol gan berson sy'n bresennol yn yr Uwchgynhadledd, fel sy'n briodol 
  • Mynd ati'n rhagweithiol i gynnal gwaith sicrwydd neu gamau yn erbyn pryderon neu faterion, gan ddefnyddio pwerau gorfodi arbennig Llywodraeth Cymru, Archwilio Cymru, Arolygiaeth Gofal Iechyd Cymru  neu'r broses Dwysáu ac Ymyrryd lle y bo'n briodol 
  • Mae sefydliadau sy'n cymryd rhan yn cydweithredu ac yn cydweithio gyda chyfoedion a rhanddeiliaid wrth i ni chwarae ein priod rolau wrth lywio'r gwaith o wella gofal iechyd yng Nghymru. 

Dyma'r sefydliadau sy'n cymryd rhan ar hyn o bryd:-

  • Arolygiaeth Gofal Iechyd Cymru (AGIC)
  • Llywodraeth Cymru – Perfformiad ac Uwchgyfeirio GIG Cymru 
  • Gweithrediaeth GIG Cymru – Perfformiad a Sicrwydd
  • Gweithrediaeth GIG Cymru – Ansawdd, Diogelwch a Gwelliant
  • Addysg a Gwella Iechyd Cymru 
  • Archwilio Cymru 
  • Arolygiaeth Gofal Cymru (AGC)
  • Llais Cymru
  • Ombwdsmon Gwasanaethau Cyhoeddus Cymru 
  • Partneriaeth Cydwasanaethau GIG Cymru – Gwasanaeth Cronfa Risg Cymru 
  • Partneriaeth Cydwasanaethau GIG Cymru – Archwilio a Sicrwydd 
  • Gwasanaeth Atal Twyll Cymru y GIG
  • Y Cyngor Meddygol Cyffredinol 
  • Y Cyngor Nyrsio a Bydwreigiaeth 
  • Y Cyngor Fferyllol Cyffredinol 
  • Y Cyngor Proffesiynau Iechyd a Gofal 

Uwchgynhadledd Eithriadol

Yn ystod 2021/22, cynhaliwyd gwaith cychwynnol i ddatblygu ffordd i reoleiddwyr gofal iechyd a chyrff gwella yng Nghymru gydweithio ac ymateb i bryderon sylweddol o ran diogelwch cleifion wrth iddynt godi. Mae hyn yn cynnwys rhannu gwybodaeth pan fydd risgiau a phryderon brys yn codi y tu allan i ddyddiadau'r Uwchgynhadledd ddwywaith y flwyddyn. Arweiniodd hyn at dreialu ‘Uwchgynhadledd Eithriadol’ i ddod â phartneriaid at ei gilydd yn gyflym i rannu a thriongli pryderon a risgiau penodol a chytuno ar gamau gweithredu cadarn a chlir. 

Diben yr Uwchgynhadledd Eithriadol yw darparu mecanwaith clir, er mwyn i aelodau'r Uwchgynhadledd Gofal Iechyd godi materion a risgiau sylweddol sy'n dod i'r amlwg mewn perthynas â diogelwch cleifion. Egwyddor graidd y gwaith hwn yw sicrhau y gall sefydliadau perthnasol rannu a thriongli gwybodaeth yn gyflym ac mewn modd amserol, er mwyn ymateb i bryderon o ran diogelwch cleifion.

Mae gan gyfarfodydd yr Uwchgynhadledd Eithriadol ffocws gwahanol iawn i'r Uwchgynadleddau ddwywaith y flwyddyn. 

  • Adolygiad cryno ôl-weithredol yw'r Uwchgynadleddau ddwywaith y flwyddyn. Mae hyn yn cynnwys arferion da a beth sydd wedi mynd yn dda, yn ogystal â risgiau a materion ym mhob Bwrdd Iechyd. Caiff y cyfarfodydd eu trefnu bob chwe mis ac maent yn cynnwys pob Bwrdd Iechyd ac Ymddiriedolaeth yng Nghymru. 
  • Caiff y cyfarfodydd eithriadol eu sbarduno gan un o'r aelod sefydliadau, pan ddaw pryder penodol neu risg benodol i'r amlwg. Mae'r cyfarfodydd yn canolbwyntio ar rannu gwybodaeth a dealltwriaeth, ac ar y camau gweithredu i'w cymryd i liniaru risgiau, ymdrin â materion, cael sicrwydd a chefnogi gwelliant. Mae'r cyfarfodydd yn canolbwyntio ar faterion penodol (a all fod yn faterion lleol neu genedlaethol), a chânt eu sbarduno drwy broses sy'n seiliedig ar ddod i gysylltiad â risg i ddiogelwch cleifion - caiff y broses ei chynnwys yn adran pedwar isod. 

Dogfennau